زعمة يڤتلـــــــــــــــــوه ؟ بقلم : نصرالدين السويلمي
بالله سامحني عندك معلومات تفصيلية على الادلة الي عند لخياري؟
لا ما عنديش وما نيش مهتم ياسر بتفاصيل العملية، ثم ناس تستهويهم اشياء كيف هكا وثم لا!
مالا تقول انت الخياري يغفص والي يعمل فيه موش صحيح؟
لا ابدا..ولَد رجّال شجاع أصيل جاء من عائلة ربي يبارك، الي قاعد يعمل فيه عبارة عن كاسحة، عندو التسرّع والقرارات الارتجالية خاصة تجاه قوة ثورية شبابية اصيلة كيف الائتلاف، وبارشا حاجات اخرين..
مالا تقول كارثة؟
انتم لكارثة والعقل هذا هو الكارثة، في بالكم الواحد يا يكون ملايكة يا شيطان! بنادم يغلط ويصيب يغفص ويجيب.. المهم راجل ما يبيعش دينو ولا يبيع عرضو ولا يهز مرتو للسفراء تصلبهم على روسهم ولا يبيع ثورتو ولا يتنكر لدم شهداء سبعطاش ديسمبر..
فهمنا علاش ماكش مهتهم ياسر بالمادة الي عندو؟
لاني ببساطة الامر يتعلق بقيس سعيد، وعندي قناعة الي السيد هذا كذاب ونرجسي ومريض بروحو وقادر باش يدمر تونس الكل من اجل نزوة في مخكو الخامر! شنو تجي كل الادلة الي عند الخياري قدام هالعتبة إلّي موقّف بلاد كاملة يحب يطيحها على ركابيها، ويمخور في الداخلية يحب يشعلها حرب بين مؤسسات الدولة، وباعنا لفرانسا قالها حماية وتخابر معاها، واقدم على اكبر خيانة في تاريخ تونس وقت كلم لفرانسيس والقطريين والطلاين باش ما يتعاونوش مع الحكومة التونسية، وحذر ليبيا من تونس!!! هنا بالنسبة ليا تقلي 5 ملاين دولار او 20 مليار دولار ما يفرقش السيد مجرم بكوارطو وكفى، ما عادش حاجتنا بالأدلة تو حاجتنا بــبطاقة ايداع، يا في السنترا يا في الرازي، المهم ايداع.
تو ثبت لينا هاك تقول لخياري كاسحة؟
ايوااااه! المهم موش في المعطيات الي عندو! المهم في العبور الى باحة الكلاب، كاسحة لأنو قاعد يقدم في عمل جبّار، قاعد يتجرأ على ميدان احتكروه كان هوما، يعملوا علينا استقصاء برنامج حواري وثائقي.. يشوهونا يقولوا عملاء يقولوا قتلة يقلوا تمويل خارجي يقولوا داعش... ولا من يحاكمهم، وتعودوا بينا نحن ما نقولوش كيفهم ونمارسوا الحذر الى حد العظم، لاني الدول العميقة عندهم في يديهم، ويتعاملوا بادوات مولغة في القذارة.. عــــاد هاو خرج ليهم طفل ما يحسبش! مهبول في راسو! الي يعملوه هوما يعملوا هو، يحل في الطريق للثورة قدام الكلاب ، يقلهم يا تجو للطرق ديمقراطية ومؤسسات وقانون وصناديق واحترام متبادل وعيش مشترك، يا نحاربكم بنفس اسلحتكم..
يمكن يغلبوه ويمكن يقتلوه زادة.. اما كان قتلوه هانو حل الطريڤ ورحل على روحو، مات راجل..... ابكي على روحك ما عملتش خيط في ابرة وعديت عمرك بين المطبخ تاكل والحمام تفرغ، واكبر انجاز ليك شاد كدية تشيش وتنبر على الرجال جايا وماشية للجبهة!
معناه يمكن يخسر المعركة؟
ما ثماش خسارة في النضال، ثم مراكمة ودربة ، المعارك جولات ما تحكيش عليها، أحكي على الحرب، والحق ما يخسرش الحرب.
باهي واذا كان بعد ڤلب الفيستا؟
أمر بسيط!
كان ثبت هانو تبع عمّار بن ياسر
وكان ڤلب ماهوش زايد من ثعلبة..........
ليست هناك تعليقات